الآن التحدي الأقوى.. من هو أستاذ الرياضيات الأكثر شعبية ؟؟؟؟

ننتقل الآن إلى تحدي أكثر إثارة، و هو الاستفتاء على أساتذة الرياضيات.. فكلهم بارعون، و كلهم رائعون، و هذا ما يجعل من التصويت أكثر متعة..
فمن برأيكم هو الأستاذ الأفضل؟؟
ملاحظة: تسمح الاختيارات المتعددة

انا بحب الاستاذ هايل لان بحب طريقة حكيو الهادئة(حكيتو بس اربع مرات)بس الاستاذ يوسف كمان حباب وفيه طاقة لحتى يجاوبك عالسؤال المكون من كلمتين اجابة الها اول ما الها اخر(احيانا بتفوت بالحيط)
اما الانسة بوليت انا بحب اناقتا وكمان اذا سألتا سؤال بتفهمك بس اذا ما سألتا لازم تدبر حالك.
بس المشكلة انو الانسة بوليت والاستاذ يوسف ما بيتفقوا ع حل التقاويم دائما(وهادا هوي السؤال الفخ ذو الاجابة المتعددة والعلامة المفقودة)

انا بحب أساتذة الرياضات كلّون وبرتبهن حسب الأهميّة عندي :
الأستاذ هايل
الأستاذ بسام
الأستاذ يوسف
الأستاذ غدير
والآنسة بوليت

أنا بحب الاستاذ بسام لانو عندو شخصية كتير فريدة يعني:
1- عندو معلومات كتيرة بالرياضيات وتطبيقاتها
2- بيقرا كتب باللغة الانكليزية ومطلع عالجديد
3- صعب انك تحدد حالتو الشعورية عند القاء القصيدة قصدي اعطاء الدرس
4- الرب وحدو بيعرف ليش بيلبس مريول بحصة الرياضيات؟؟؟
5- كان طالع كتير كووول باجتماع المشاريع...
6- عالرايح والجاي بيرقعني طيارات ليش مابعرف بس يمكن لانو عرفان اني فاتح مسنجر ومخبيه......

و ما مننسى أنو بيضل بيقللي جهبوذة ....... ع شو ما بعرف ؟؟؟؟

بالتهاية كل الاساتذة رائعين وانا عنجد غلطت وقت قلت انوالاستاذ يوسف احيانا بفوتنا بالحيط لان الغلط مومنو وهادا الشي واضح للكل لأن اكيد مافي استاذ اجا ليدرس هون الى وهوي قد المسؤولية وبالاخير كلنا ربحانين انو عم نتعلم هون وانو هيدول اساتذتنا

الأستاذ المفضل عندي هوي الاستاذ بسام لأنو عندو معلومات قيمة ومناسبة وبيقدر يوصلها للسائل
أما الاستاذ هايل فاعور مع احترامي الشديد إلو فهوي بيطول الشرح كتير ولدرجة كبيرة بالنتيجة إما بتمل أو بتضيع الطاسة فما بتعرف وين الاستاذ عم يحكي ووين صار هوي
والاستاذ غدير ما بنشوفو إلى قاعد على اللابتوب بس أحيانا بيشرح وبيتحرك بالحصة

أنا ما كتير بعرف الأستاذ هايل بس برأيي هو أستاذ قدير بكل معاني الكلمة
طريقة شرحو حلوة إذا تعودت عليا ، الأستاذ بسام حباب (عطانا كم جلسة بأول السنة) بس بدي كتييير لبلش افهم الدرس لأنو طريقتو مميزة وجديدة وعندو معلومات كتير ما بتكون دايما مرتبة ، الآنسة بوليت أنا بحبها كتير ممكن أحيانا ما أفهم عليا بس بتضل روعة ، الأستاذ يوسف يوم بيشرح الدرس وبيفهم الطلاب عالمزبوط ويوم ما بيكون كتير رايق (بيكون مزاجو معكر -في كتير مصادر ازعاج-)، والأستاذ غدير ما بعرفو أبدا.